Артыкулы: Гарабурды

Гарабурды, шляхецкі род герба «Габданк». Паходзілі, відаць, з полацкіх баяр. Найб. вядомыя:

Сямён Багданавіч, полацкі баярын, у час Інфлянцкай вайны 1558—82 трапіў у маскоўскі палон. Валодаў у Полацкім ваяв. Азярцамі, Гарадзеяй, Ушачамі і інш. Лукаш Багданавіч, каралеўскі дваранін, удзельнік пасольстваў у Маскву ў 1537 і 1558. У 1563—66 у маскоўскім палоне. Міхаіл Багданавіч(?—1586), дыпламат, гл. Гарабурда М.Б. Васіль Міхайлавіч, друкар, гл. Гарабурда В.М. Міхал Кароль (каля 1640—1709), дзярж. і вайсковы дзеяч ВКЛ. У 1666 дэпутат Трыбунала ВКЛ, пасол на соймы 1688—99, з 1691 маршалак слонімскі. Выступаў супраць групоўкі Сапегаў. Камандаваў слонімскай харугвай у Алькеніцкай бітве 1700, дзе Сапегі былі разбіты.

© Валерый Пазднякоў, 2005